Oqtay Abdullayev: Turan Tovuzun hədəfi Premyer Liqaya yüksəlməkdir
"Turan Tovuz"un Müşahidə Şurasının sədri Oqtay Abdullayev komandanın Birinci Divizonun yeni mövsümünə uğurlu start verməsindən danışıb. Azerisport.az saytına açıqlamasında o, bunları söyləyib:
"Bu klubdakı ilk iş ilimiz daha çox bərpa prosesinə həsr olunmuşdu. Bu mövsüm isə qarşımıza yüksək hədəflər qoymuşuq. Premyer Liqaya yüksəlmək istəyirik. Bunun üçün də hələ ötən mövsümdən komandanın sükanı arxasına Əsgər Abdullayevi gətirdik. O, yaxşı komanda formalaşdırıb. Onun keçmiş futbolçusu Nadir Nəbiyev də bizim strukturda çalışır. İşlər tam gücü ilə davam edir. Startda üç qələbə yaxşı nəticədir. Amma bu, hələ mövsümün əvvəlidir. Fikrimcə, qarşıya qoyduğumuz məqsədə çata bilərik. Tovuzun icra hakimi Tofiq Zeynalov da bizə yaxşı dəstək göstərir. O, futbolu sevən insandır. Bizə kömək edir. Tovuzda futbolu sevirlər. Biz onları tribunalara toplamaq üçün çalışmırıq, onlar özləri hər oyunda bizə dəstək göstərirlər".