Rəşad Abdullayev: Özüm Neftçiyə müraciət etmərəm, amma onlar istəsə...
Futbol üzrə Azərbaycan yığmasının sabiq yarımmüdafiəçisi Rəşad Abdullayevin azerisport.az saytına müsahibəsi
- Hələ karyeranızı başa vurmamısınız?
- Hələ tam rəsmiləşməyib. "Zirə" mənim üçün vida matçı təşkil etməyi təklif etdi. Amma mən hələ oynamaq istəyirəm.
- Nə əcəb özünüzə yeni klub tapa bilmirsiniz?
- Birinci divizion klublarından təkliflər var idi. Amma mən demişəm ki, oynasam, yalnız Premyer Liqada çıxış edəcəyəm. Məsələ heç pulda da deyil. Normal müqavilə təklif edən klub tapmaq olar. Nə qədər yekəxana səslənsə də, mənim səviyyəm Premyer Liqada oynamağa imkan verir.
- Bəlkə, Mahir Şükürov kimi, siz də "Neftçi"yə müraciət edəsiniz?
- Bu, mənim üslubum deyil. Amma bakılılar təklif etsələr, mən hazıram. Həm də orada elə vəziyyət yaranıb ki, təcrübəli oyunçulara ehtiyac var. Özüm müraciət etməyəcəyəm. Mahirə gəlincə, forma yığsa, komandaya faydası toxuna bilər.
- Bəs siz hazırda necə formadasız?
- Normal. Mənim sadəcə, bir neçə aydır oyun təcrübəm yoxdur. Amma fərdi proqram üzrə məşq edirəm. Hazırda azad agentəm. Kimsə xidmətimdə maraqlı olsa, kömək etməyə hazıram (gülür).
- Bəs belə bir təklif olmasa?
- Karyeramı başa vuracağam. Amma hiss edirəm ki, hələ oynaya bilərəm. Premyer Liqamızın hazırkı səviyyəsini nəzərə alsaq, bu çempionatda sakitcə oynaya bilərəm.