Ağabala Ramazanov: Matça motivasiyalı çıxmışdıq, amma alınmadı
Azərbaycan yığmasının hücumçusu Ağabala Ramazanov Avstriya toplanışı çərçivəsində Makedoniyaya qarşı keçirilmiş yoxlama oyunundan sonra azerisport.az saytının suallarını cavablandırıb.
- 1:3 hesablı məğlubiyyəti necə şərh edərdiniz?
- Robert Prosineçki bizə oyundan öncə bu rəqiblə beş oyun keçirib, heç birində qələbə qazanmadığımızı söyləmişdi. Sadəcə, bir heç-heçəmiz vardı. Düzdür, həmin oyunların heç birində iştirak etməsəm də, bu görüşə kifayət qədər yaxşı motivasiya ilə çıxmışdım.
- Amma bu motivasiya komandamızı növbəti məğlubiyyətdən xilas etmədi...
- Oyuna ciddi yanaşırdıq. Amma birinci yarıda çox zəif oynadıq. Bunun səbəbini demək çətindir. İkinci hissədə isə hər şey fərqli idi. Hətta mənim də qol vurmaq şansm oldu. Üçüncü qolu nəzərə almasaq, fasilədən sonra hər şey yaxşı alındı.
- Bəs ən azı məğlubiyyətdən qaçmaq üçün nə çatmadı?
- Bunu mən deyə bilmərəm. Məşqçilər daha yaxşı bilər.
- Bəs sırf sizin qol vurmağınız üçün nə çatmadı?
- Ola bilsin ki, təcrübə. Ya da başqa nəsə.
- "İnter"ə keçidiniz barədə nə deyərdiniz?
- Mənə bir neçə klubdan təklif vardı. Amma "İnter"i seçməyə qərar verdim. Əminəm ki, səhv etməmişəm. Klub yerli futbolçulardan ibarət yaxşı kollektiv yaratmağa başlayıb. Çempionluq uğrunda mübarizə aparacağıq.