Elvin Bədəlov: Hədəfimiz kuboku qazanmaqdır
"Neftçi"nin müdafiəçisi Elvin Bədəlov Azərbaycan Kubokunun yarımfinal mərhələsi çərçivəsində "Qəbələ"yə qarşı keçirdikləri cavab oyunundan sonra azerisport.az saytının suallarını cavablandırıb:
- Kubokun finalına çıxmağınız necədir?
- Əla! Şadam ki, finala vəsiqə qazandıq. Artıq üçüncü mövsümdür finalda oynayacağıq. Bu, komandamızın gücündən xəbər verir. Finala çıxmaq "Neftçi"nin haqqı idi. Klubumuz da buna nail oldu.
- Siz özünüz isə ardıcıl ikinci mövsüm finalda oynamaq şansı qazanırsınız...
- Bəli, bu da mənim şəxsi uğurumdur və təbii ki, buna görə çox şadam.
- Amma "Qəbələ"nin güclü rəqib olduğunu nəzərə alsaq, "Neftçi"nin finala çıxması çox adam üçün gözlənilməz oldu...
- Hər iki komanda finala çıxmaq istəyirdi. Amma bir halda ki, bu uğura biz nail olduq, deməli, buna layiq idik. Şadam ki, belə gərgin qarşıdurmanın qalibi olduq.
- Ermin Zets sizə qol vuranda, onu kobudluqla dayandıra bilərdiniz. Komandanızı azlıqda qoymaqdan qorxdunuz?
- Həmin epizodda Zetsə yaxın idim, amma onu vurmaq istəmədim. Baş hakim mənə qırmızı vərəqə göstərə bilərdi. O zaman "Qəbələ" üçün növbəti qolları vurmaq daha da asanlaşacaqdı. Fikrimcə, düzgün qərar qəbul etdim.
- Penalti seriyası zamanı nə düşünürdünüz?
- Həyəcanlı idim. Amma komanda yoldaşlarıma inanmağa çalışırdım. Penalti seriyasında uğur qazanacağımıza inanırdım.
- Siz özünüz penalti vurmağı istəmədiniz, ya məşqçilər güvənmədilər?
- Mən də vurmaq istəyərdim. Amma bizim öz penalti vuranlarımız var. Əslində, zərbələri kimin vurmasının ciddi fərqi yox idi. Əsas hər şeyin komandamız üçün yaxşı başa çatması idi.
- "Neftçi" ötən mövsüm olduğu kimi, yenə finalda "Qarabağ"la qarşılaşacaq. Ötən ilki məğlubiyyətin əvəzini çıxa biləcəksiniz?
- Çox çətin olacaq. Çünki rəqibimiz çox güclü komandadır. Amma biz ciddi hazırlaşacağıq. Finalda da qələbə qazanmaq istəyirik.
- Final matçının öncə Gəncədə keçirilməsi müzakirə olunurdu. Amma deyəsən, həlledici matç Bakıda olacaq...
- Gəncədəki stadionun qazonu elə də yaxşı deyil. Amma bir məqam var ki, matçın harada keçirilməsindən asılı olmayaraq, hər iki komanda oxşar şərtlər altında oynayacaq. Hədəfimiz kuboku qazanmaqdır. Ona görə də hər çətinliyə sinə gərməyə hazırıq.