Robert Prosineçki: Milli indi daha aqressiv oynayır
Azərbaycan yığmasının baş məşqçisi Robert Prosineçki Aç-2016-nın seçmə mərhələsi çərçivəsində Xorvatiyaya qarşı oyun öncəsi mətbuat konfransı keçirib. Azerisport.az xəbər verir ki, xorvatiyalı mütəxəssis həmyerlilərinə qarşı oyun ərəfəsində öncə bunları söyləyib:
- Komanda artıq 10 gündür bir yerdədir. Hamı düşərgədədir. Sabah bizi çətin oyun gözləyir. Artıq bu görüşə hazırıq. Hazırlıq prosesindən razıyam. Rəqibdən qorxmuruq. Yaxşı oyun göstərməyə hazırıq. Yaxşı nəticə qazanmaq istəyirik.
- Avropa Liqasında çıxış edən futbolçuların yorğunluğu millinin çıxışına təsir göstərməyəcək?
- Qətiyyən yox. Futbolçularımız peşəkardırlar. Hazırlıq üçün vaxtımız oldu. "Qarabağ"la "Qəbələ"nin Avroliqanın qrup mərhələsinə vəsiqə qazanmasına çox şadam. Bu, Azərbaycan futbolu üçün mühüm uğurdur. Onları qarşıda böyük oyunlar gözləyir.
- Əvvəllər milliyə çağırmadığınız Nurlan Novruzovla bağlı qərarınızı bu dəfə dəyişsəniz də, o, yenə heyətdə çox qalmadı. Nə baş verdi ki?
- Hər mətbuat konfransında niyə Nurlanla bağlı suallar verildiyini anlamıram. Sabah biz heyətində Rakitiç, Modriç kimi futbolçuların yer aldığı Xorvatiyaya qarşı oynayacağıq. Toplanışın ilk günlərində bütün futbolçular hazırlıqda iştirak etmirdi. Mən də Nurlanı ona görə dəvət etmişdim ki, onu baxışdan keçirim.
- Sabahkı oyun üçün start heyətini müəyyənləşdirmisiniz?
- Heyəti deyə bilərəm. Heç bir problem yoxdur. Yeganə sual doğuran məqam Əfran İsmayılovla bağlıdır. Onun bir az problemi var. Ciddi deyil. Hər şeyə son məşqin ardından qərar verəcəyəm. Meydana ilk dəqiqələrdən çıxacağını dəqiqləşdirdiyim digər oyunçular isə bunlardır: Kamran Ağayev, Bədavi Hüseynov, Rəşad Sadıqov, Məhəmməd Mirzəbəyov, Arif Daşdəmirov, Qara Qarayev, Rahid Əmirquliyev, Dmitri Nazarov, Ruslan Qurbanov, Məhəmməd Qurbanov.
- Məhəmməd Mirzəbəyov daha az oyun təcrübəsinə malikdir. Amma siz onu çağırmısınız, "Qarabağ"ın heyətində həmin mövqedə çıxış edən İlqar Qurbanovu yox...
- Mən sizə heyəti açıqlayıram, siz isə mənə təklif edirsiniz. İlqar indi ona görə oynayır ki, Maksim Medvedev zədəlidir. Halbuki, Maksim formada olanda İlqar oynamırdı. Artıq Azərbaycanda xeyli müddətdir yaşayıram və hər şeyi görürəm. Mirzəbəyov çox oynamasa da, aqressivdir, sürətli futbolçudur. Onun cinahında Perişiç oynayacaq. Bizə də Perişiçə qarşı oynamaq üçün məhz Mirzəbəyov kimi futbolçu lazımdır.
- Xorvatiyaya 0:6 hesabıyla uduzduğumuz oyundan hansı nəticə çıxarmısınız?
- Azərbaycan yığması artıq Osiyekdə uduzan komanda deyil. Çox dəyişiklik olub. Daha aqressiv oynayırıq. Bunu son oyunlarımızda da göstərmişik. Uşaqlar özlərinə inanırlar. Düzdür, rəqib komandanın üzvləri top-klublarda çıxış edirlər. Amma bu, bizi qorxutmur. Azərbaycan yığması həmin oyunda çox səhvə yol vermişdi. Nəticəni öncədən deyə bilmərəm. Amma sabah yaxşı oyun göstərəcəyimizi deyə bilərəm.
