Məmmədyarov: Naydiçin yığmamızda oynamasına rəhbərlik şərh versə, daha yaxşı olar
Kişi şahmatçılardan ibarət Azərbaycan yığmasının lideri Şəhriyar Məmmədyarov Almaniya millisinin üzvü Arkadi Naydiçlə Azərbaycan Şahmat Federasiyası arasında imzalanan müqavilə haqda fikirlərini bildirib. Azerisport.az xəbər verir ki, razılaşmaya əsasən Naydiç bundan sonra Azərbaycan yığmasının uğurları üçün çalışacaq.
Məsələyə münasibət bildirən Şəhriyar Məmmədyarov transferə şərh verməyin əleyhinə olduğunu deyib: "Belə qərarları Azərbaycan Şahmat Federasiyası qəbul edə bilər. Bizim buna şərh verməyimiz düzgün deyil. Azərbaycan şahmatçılarını qarşıda ciddi yarışlar gözləyir. Bakıda Dünya Kuboku və şahmat olimpiadası keçiriləcək. Olimpiada ilk dəfə paytaxtımızda keçirildiyindən federasiya yaxşı nəticə qazanmaq istəyir. Ona görə qərarı başa düşmək olar. Millimizin olimpiadada çıxışına federasiya və məşqçilər cavabdehlik daşıyır. Yəni, yaxşı və ya pis nəticə olsa belə hər zaman federasiya və məşqçi buna cavabdehdir. Mən yığmanın üzvü kimi millinin uğur qazanması üçün əlimdən gələni edəcəm. Ümumi nəticəyə isə federasiya münasibət bildirəcək. Ona görə Arkadi Naydiçin yığmamızda oynamasına rəhbərlik şərh versə, daha yaxşı olar".
Məmmədyarov vaxtı ilə Vüqar Həşimovun dönəmində yığmanın güclü olduğunu etiraf etdi. Gənc şahmatçımızın vaxtsız vəfatından sonra isə bir qədər çətinlik yarandı: "Azərbaycan millisində reytinqi 2700-dən yuxarı olan üç şahmatçı olub. Mən, Teymur Rəcəbov və Vüqar Həşimov. Təəssüf ki, Həşimovun vaxtsız vəfatı hamımıza təsir etdi. Bu üçlük hər zaman bir-birinə dəstək olub. Vüqar yarış zamanı özü çıxış etməyəndə mənə məsləhət verirdi. Və yə əksinə olurdu. Biz bir komanda olmuşuq. Sözsüz ki, Qədir Hüseynov, Rauf Məmmədov və Eltac Səfərli də komandamızın üzvləridir. Onların uğurlarımızda payı az deyil. Lakin Vüqarın vəfatından sonra onun yerini heç kim tuta bilmədi. Qədir, Rauf və Eltacdan böyük nəticələr gözləyirik. Amma indiki zamanda millidə iki 2700-dən yuxarı reytinqi olan şahmatçı var, ona görə bir qədər çətindir. Həşimov millidə olanda heç vaxt legionerə ehtiyacımız olmayıb".
Sumqayıt şahmat məktəbinin yetirməsi gələn il Bakıda keçiriləcək şahmat olimpiadasında uğur qazanmağın vacib olduğunu söylədi: "Millimiz yəqin ki, olimpiadaya xüsusi hazırlıq keçəcək. Şahmat olimpiadası ilk dəfə Bakıda keçirilir. Bizə böyük ümid bəslənilir. Ona görə maksimum dərəcədə yaxşı çıxış etmək lazımdır. Necə alınacağını demək çətindir. Hər bir şahmatçımızın yüksək potensialı var".
Məmmədyarov son 10 ildə ölkədə yeni yüksək reytinqli şahmatçının meydana çıxmadığını söylədi. Onun sözlərinə görə gənclər arasında inkişaf var, amma onlar yeni səviyəyə yüksəlməkdə çətinlik çəkir: "Bizim vaxtımızda qrossmeysterlərlə görüş olanda günlərlə həyəcan keçirirdik. Fikirləşirdik ki, onunla necə görüşəcəyik. Hansı məsləhətləri almaq olar. İndiki uşaqlarda daha yaxşı şəraitlər var. Onlar mütəmadi olaraq yığma üzvləriylə görüşlərdə iştirak edir, istənilən suala cavab veririk. Bu fürsətlərdən istifadə etmək lazımdır. Azərbaycanın Vüqar Həşimov kimi şahmatçısı olub. Onu öyrənmək lazımdır. Onun karyerası gənclər üçün dərslikdir. Mən indiyə qədər Boris Gelfand üzərində möhtəşəm qələbəsini xatırlayıram. Bəlkə də uşaqların çoxu həmin partiyaya baxmayıb. Son 10 ildə yığma səviyyəsində yeni şahmatçı meydana çıxmayıb. Gənclər sona qədər çalışmalıdır ki, gələcəkdə milliyə dəvət olunsun. Biz hər zaman millidə olmaya bilərik. İstərdim ki, bizdən sonrakı nəsil daha güclü olsun".
Şəhriyar Məmmədyarov şahmat olimpiadasında uğur qazanmaqla Vüqar Həşimovun arzusunu həyata keçirəcəklərini bildirdi: "Vüqar hər zaman olimpiadada medal qazanmağımızı istəyirdi. Bir neçə dəfə medal şansımız olsa da, sonda alınmayıb. Bakıda keçirilən olimpiadada medal qazansaq onun arzusunu həyata keçirmiş olarıq. Uğurumuz olacağı halda onu Vüqara həsr edəcəyik".