Kirsan İlyumjinov: Heydər Əliyevin diqqəti olmasaydı, Kasparov 13-cü dünya çempionu olmazdı
Bu gün Şəmkirdə Vüqar Həşimovun xatirəsinə həsr olunmuş sayca ikinci beynəlxalq turnirin açılış mərasimi keçirilib. Azerisport.az xəbər verir ki, tədbirdə Beynəlxalq Şahmat Federasiyasının prezidenti Kirsan İlyumjinov da iştirak edib.
Şəmkirin icra başçısı Alimpaşa Nemətov turnirin açılış mərasimində bunları söyləyib: "Hamınızı xoş gördük. Xoş gəlmisiniz. Bu turnirin yüksək səviyyədə keçməsi üçün əlimizdən gələni edəcəyik. Azərbaycan istənilən yarışı keçirə bilər. Biz həmişə idmançılarımız üçün yaxşı şərait yaratmağa çalışırıq".
Ardıdan turnirin direktoru Fəxriyar Cabbarov danışıb: "Şəmkir 10 gün ərzində dünya şahmatının diqqət mərkəzində olacaq. Əsas Vüqar Həşimovu yad etmək və dövlət proqramına əsasən şahmatın inkişafına töhfə verməkdir. Yarışı açıq elan edirəm".
Gənclər və idman nazirinin müavini İsmayılov da İsmayılov fikirlərini bölüşüb: "Vüqar güclü şahmatçı olub. Millinin Avropa çempionu olmasında böyük rol oynayıb. Xəstəlik ona problem yaratdı. Həkimlər razı olmasa da, o, şahmatı atmadı".
Vüqarın atası - Qasım Həşimov da turnirlə bağlı düşüncələrini paylaşıb: "Turnirdə 10 güclü şahmatçı iştirak edir. Bu, turnirin səviyyəsindən xəbər verir. FİDE prezidentinə gəldiyi üçün təşəkkür edirəm. Maqnusa çox sağ ol deyirəm. Maqnus çempion olandan sonra demişdi ki, iyuna qədər heç bir yarışda olmayacaq. Amma Vüqarın xatirəsinə hörmət olaraq gəldi. Vüqar heç vaxt sağlamlığını düşünməyib. Həmişə verdiyi sözü yerinə yetirməyə çalışırdı. Fikrimcə, bu yarış ənənəvi olmalıdır".
İlyumjinov da tədbirdə çıxış edib: "182 ölkə adından sizi salamlayıram. 10 gün ərzində bütün dünyanın diqqəti burada olacaq. Şəmkir çox xoşuma gəldi. Təmizdir, gözəldir. Bu gün bütün ulduzlar Şəmkirdədir. Azərbaycanda şahmat ənənələri var. Heydər Əliyev həmişə şahmatın inkişafına kömək olub. Onun diqqəti olmasaydı, Kasparov 13-cü dünya çempionu olmazdı. İlham Əliyev yeganə prezidentdir ki, şahmata dövlət proqramı həsr edib".
Qeyd edək ki, turnirdə Maqnus Karlsen, Vişi Anand, Vladimir Kramnik, Fabiano Karuana, Aniş Qiri, Uelsi So, Maksim Vaşye-Laqrav, Maykl Adams, Şəhriyar Məmmədyarov və Rauf Məmmədov mübarizə aparacaq. İlk tur sabah saat 15:00-da start götürəcək.
İlk turda aşağıdakı görüşlər baş tutacaq:
Vişi Anand - Maqnus Karlsen
Vladimir Kramnik - Maykl Adams
Şəhriyar Məmmədyarov - Fabiano Karuana
Uesli So - Aniş Qiri
Rauf Məmmədov - Maksim Vaşye-Laqrav