Millimizdə şok baş məşqçi dəyişikliyi
Boks üzrə Azərbaycan millisinin baş məşqçisi Vladimir Zolotaryov istefaya göndərilib. Azerisport.az xəbər verir ki, ukraynalı məşqçinin vaxtında millimiz kifayət qədər ciddi nəticələr qazanıb.
Onun rəhbərliyi vaxtında Azərbaycan millisi Avropa çempionatında 1 qızıl, 1 gümüş, 2 bürünc medal əldə etmişdi. Dünya çempionatında isə ilk dəfə Azərbaycan 2 qızıl medala layiq görülüb. Mundialda Cavid Çələbiyevlə Məhəmmədrəsul Məcidov qızıl, Teymur Məmmədov isə bürünc medal qazanıb. Bütün bu faktlardan sonra onun istefası gözlənilməz olub.
Azərbaycan Boks Federasiyasının vitse-prezidenti Aöacan Əbiyev məsələyə belə münasibət bildirib: "Zolotaryovun istefasıyla bağlı fikir bildirə bilmərəm. Ancaq millimizin son Avropa və dünya çempionatlarında qazandığı nəticələri onun adına yazmağın əleyhinəyəm. Əgər Zolotaryov yeniyetmələrdən uşaq götürüb Avropa və dünya çempionu eləsəydi, onda onun əməyinin nəticəsi demək olardı. İndiki halda isə bu boksçular hazır idmançılar olub. Əksəriyyəti titullu boksçulardı. Sadəcə, uğur onun vaxtı olub. Unutmaq olmaz ki, dünya və Avropa çempionu 5-10 ilə hazırlanır. 1 ilə dünya və Avropa çempionu hazırlamaq mümkün deyil. Zolotaryov hazır komandayla çalışıb. Azərbaycan boks yığmasının uğuru 10 illər komandada çalışan insanların əməyinin nəticəsidi. Milli komanda son 10 ildə yenidən formalaşdı və indi biz onun nəticəsini görürük."
Qeyd edək ki, istefadan sonra Zolotaryovla çalışan əcnəbi məşqçilər də millidən uzaqlaşdırılıb. Artıq yığmanın yeni məşqçisinin adı da məlumdu. Yaxın günlərdə kubalı Pedro Rokye Otano millisinin sükanı arxasına keçəcək. Kubalı məşqçi son olaraq ABŞ millisinin baş məşqçisi olub.
